#Кыскача яңалыклар 15 декабря 2017, 11:07

Балаларга пиротехника сатучыларны 200 мең штраф көтә

15 декабря 2017, 11:07

«Алда безне Чыршы бәйрәмнәре, Яңа ел каникулы көтә. Чыршы бәйрәме кайгы-хәсрәткә әверелмәсен, кешеләр саклык чаралары күрсен, кагыйдәләрне үтәсен иде», – диде «Татар-информ» мәгълүмат агентлыгында узган матбугат конференциясендә Россия Гадәттән тыш хәлләр министрлыгының Татарстан буенча баш идарәсенең күзәтчелек һәм профилактика эшчәнлеге идарәсе җитәкчесе урынбасары Максим Трущин.

Скопировать ссылку

Пиротехник товарлар белән аеруча сак эш йөртү сорала. 16 яшь тулмаган балаларга утлы пиротехник продукция сатып җибәрү тыела. Сәүдә кагыйдәләрен бозган өчен 150-200 мең сум штраф яный.
Бина эчендә бенгаль утларын кабызырга һәм «хлопушка» аттырырга ярый, ә салют җибәрү тыела. Бенгаль уты чыбыгын тәмам сүнмичә һәм суынмыйча торып, чүп чиләгенә яки урын-җир өстенә ташларга ярамый. Салютны торак бинадан – 30-50 метр, ә сәнәгать корылмаларыннан 500 метр читтә генә аттырырга рөхсәт ителә. Шулай ук салют электр линияләре, агач ботаклары астында торырга тиеш түгел. Бу кагыйдәләрне бозган кешеләргә 2-3 мең сум штраф салына.
Быелның 30 декабреннән киләсе елның 8 гыйнварына кадәр МЧС хезмәткәрләре, балалар йортларында һәм өлкәннәр интернатларында янгын куркынычсызлыгын тикшерер өчен, төнге рейдлар үткәрәчәк.
Татарстанда 20 декабрьдән киләсе елның 10 гыйнварына кадәр «Янгыннарга каршы катгый режим» тәртибе кертелә. Пиротехник товарлар сатучылар, учреждениеләрнең янгын куркынычсызлыгы таләпләрен ни дәрәҗәдә гамәлгә ашырулары тикшереләчәк.

Татарстанда узган елның 1 декабреннән быелның 1 гыйнварына кадәрге вакыт аралыгында 578 янгын чыккан. Нәтиҗәдә, 41 кеше янып үлгән, 48 кеше төрле авырлыктагы тән җәрәхәте алган, янгыннардан 4,5 миллион сум матди зыян килгән.

#пиротехника